ടോക്കിയോ: ജപ്പാൻ പ്രധാനമന്ത്രി ഷിൻസോ ആബെ രാജിക്കൊരുങ്ങുന്നതായി റിപ്പോർട്ട്. ആരോഗ്യപരമായ കാരണങ്ങൾ കൊണ്ടാണ് അദ്ദേഹം രാജിവെക്കുന്നതെന്നും ജാപ്പനീസ് പ്രാദേശിക മാധ്യമങ്ങൾ റിപ്പോർട്ട് ചെയ്തു. ആബെയുടെ വാർത്താസമ്മേളനം നടക്കാൻ മണിക്കൂറുകൾ മാത്രം ശേഷിക്കെയാണ് രാജിവാർത്ത പുറത്ത് വന്നത്.
ആരോഗ്യം മോശമായതിനെ തുടർന്ന് ആബെ രാജിവെക്കാൻ ഒരുങ്ങുകയാണെന്ന് ജപ്പാനിലെ ടെലിവിഷൻ ചാനലായ എൻ.എച്ച്.കെയാണ് റിപ്പോർട്ട് ചെയ്തത്. കഴിഞ്ഞയാഴ്ച രണ്ട് തവണയാണ് അസുഖത്തെ തുടർന്ന് ആബെ ആശുപത്രിയിൽ ചികൽസ തേടിയത്.
ഇന്ന് വൈകീട്ട് അഞ്ച് മണിക്കാണ് ആബെയുടെ വാർത്താ സമ്മേളനം നടക്കുന്നത്. രാജിയെ കുറിച്ചുള്ള കൂടുതൽ വിവരങ്ങൾ വാർത്താസമ്മേളനത്തിൽ ആബെ പറയുമെന്നാണ് സൂചന.
